جمهور الزمالك عليه عامل كبير و هو العامل الاكبر من وجهه نظرى فى الماتش و خاصه فى استاد القاهرة ( الرعب ) اللى معروف ان المنافس فيه بيبقى اكنه فى كابوس بيتمنى انه يخلص بسرعه و ميكملش ال 90 دقيقه و طبعا فرق شمال افريقيا خاصه عارفه النقطه ديه فاتمنى ان جمهور الزمالك كالعاده يكون ورا الفريق و يساند بقوة و يقفل الاستاد و تشجيع متواصل و حماس داخل الملعب
- عامل الوقت :
اول ربع ساعه هى مفتاح التاهل و احراز جول فى اول ربع ساعه حيدى دفعه للاعيبه الزمالك اكتر و رهبه للاعيبه الافريقى و تخبط فى حسابات المدير الفنى قيس اليعقوبى و لازم الزمالك يضغط اول ربع ساعه بطريقه مش طبيعيه و مع الحماس و ضغط الجماهير اعتقد ان ده احسن وقت يتحط فيه جول للزمالك عشان يريح اعصابه الى حد ما بقيه الماتش
دفاع الافريقى : ( بلال عيفة ) باك يمين الافريقى -
هو اللى حط الجول الرابع فى الزمالك لكن لاحظت انه مدافع على اده و لما بيتضغط عليه بيشتت الكورة او بيرتبك و حتى شكله مينفعش باك يمين و طريقته مش طريقه لاعيب عالى و اعتقد ده نقطه ضعف الافريقى و بما انه باك يمين و الجبهه ديه فيها عبد الشافى و حسين ياسر اعتقد ان حسين ياسر حياكل عليه عيش و ممكن ياخد منه فاولات او ضربه جزاء او يعدى بسهوله و اى عرضيه من الجنب ده جوة ال 18 حتبقى خطرة خاصه فى وجود البلدوزر عمرو زكى اللى بيهد اى دفاع و اعتقد ان الزمالك لازم يخترق الجبهه اليمنى للافريقى باى شكل و ده مفتاح فوزنا ع الافريقى
على فكرة دفاع الافريقى تانى اضعف دفاع فى الدورى التونسى
الضربات الثابته : شيكابالا -
فى ماتش الذهاب شيكا حط جول عالمى من فاول و من مسافه بعيده و اعتقد ان اى فاول للزمالك لازم يستغله خاصه ضعف حارس الافريقى عادل النفزى و عشان كده شيكا او حسين ياسر بمهاراتهم لازم يحاولو يجيبو فاولات من على حدود ال 18 و اى كورة ثابته من اى مكان حتبقى خطر ع الافريقى خاصه ان جولين الزمالك فى الماتش اللى فات كانو من كور ثابته و واضح ان تمركز لاعيبه الافريقى مبيبقاش مظبوط فما بالك فى ملعبهم و بيرتبكو اعتقد انهم حيرتبكو من غير حاجه فى ستاد الرعب و فى وجود النفزى بطالب لاعيبه الزمالك تشوط كتير من برة ال 18 و يبقى فيه متابعه من عمرو زكى لاى صده من النفزى
اعتقد رجوع ابراهيم صلاح الماتش الجاى حيفرق كتير مع الزمالك و فى الماتشات الكبيرة ابراهيم صلاح لما بيغيب الزمالك بيتاثر جامد و ابراهيم من اللاعيبه اللى مجهودها عالى و بتضغط فى كل مكان فى الملعب و اعتقد ان حيبقى ليه دور تكتيكى كبير فى تعطيل هجمات الافريقى و خصوصا الضغط على الزوادى اخطر لاعيب فى الافريقى و المحرك الرئيسى للفريق من وجهه نظرى
لو القيصر فتح الله فايق مفيش قلق على دفاع الزمالك ان شاء الله و فتح الله حاليا من احسن المساكين فى مصر و لو موفق و فى يومه حيقدر يظبط دفاع الزمالك و يغطى على اى غلطه من الصفتى مثلا و فتح الله المطش ده بالذات عليه دور كبير خصوصا انه كان من هدافى الزمالك فى دور الاول فى الدورى رغم انه مدافع لكن عنده ميزة العاب الهوا من الضربات الثابته و هو المتخصص الاول فى ضربات الجزاء فى الفريق و اللى اتوقع ان حيبقى فيه ضربه جزاء فى الماتش ده للزمالك
: بالنسبه لتشكيل الزمالك يبقى كده
عبد الواحد السيد
عبد الشافى فتح الله الصفتى احمد سمير
ابراهيم صلاح
هانى سعيد حسن مصطفى
حسين ياسر شيكابالا
عمرو زكى
------------------------------------------------------------------------------
اتمنى ان محمد ابراهيم ميبدأش لانه فى الماتشات اللى بدأها معظمها مقدمش فيها مستوى عالى و بيبقى فردى و لما بيبقى احتياطى و بينزل بيعمل شغل عالى -
لو الزمالك متقدم 2-0 لازم يلعب على انه يحط جول تالت لانه الجول التالت حيريح كتير حتى لو الافريقى خطف جول حيبقى الزمالك متاهل برضه و التغييرات عبارة عن عاشور الادهم مكان واحد من الديفندرات لتامين النتيجه و كمان عاشور لاعيب رجله تقيله و ممكن بشوطه يخلص بيها على الافريقى و التغيير التانى هو حازم امام او محمد ابراهيم مكان حسين ياسر لازعاج دفاع الافريقى و استهلاك الوقت
لو الشوط الاول خلص 0-0 لازم الزمالك يسحب اى ديفندر من نص الملعب و ينزل جعفر او عوديه جنب عمرو زكى
و ان شاء الله الزمالك حيعدى عقبه الافريقى
